قاللك.. لما افوق واروق ابقى اعمل واسوي .. انا مستني افوق واروق عشان اروح اسكندرية تاني واعد اتفرج بس وامارس الفرجة بشغف .. مستني افوق واروق عشان اطلع اصور بقية البومي بتاع سوهاج .. مستني افوق واروق واانزل اسوان اسأل صاحبنا اياه اعمل ايه تاني.. مستني افوق واروق وارجع اكتب تاني زي زمان .. مستني افوق واروق عشان ارتب اوضتي .. مستني افوق واروق عشان استحمى ..
هو بس المشكلة اني عرفت خلاص انو الواحد مش هيفوق ولا يروق الا في التربة ..ولو عاكك يبقى حتى في التربة ولا هتفوق ولا هتروق ,, طبعا لقيتها هبلة قوي اني استهبل وارمي سلك الدي اس ال في التربة واقعد ادفع اشتراك من دلوقتي الى ان يقضي الله امرا كان مفعولا ..
دايما كان بييجي في بالي انو لازم عشان تعمل بلوج تكون تبع الجماعة اللي بياخدو اللاب تحت ايديهم وينزلو ياخدو قهوة الصبح مع كرواسون جبنة في كوستا او سيلينترو .. او حتى في الامريكين .. بس المعجزة الحقيقية .. اني عملت بلوج اهه وانا قاعد على سريري .. لابس لبس البيت .. ومعايا كوباية شاي وموزتين عشان لو جعت بالليل بكسل انزل المطبخ
قلت الحق اعمل البلوج اللي بحلم بيه طول عمري .. ويارب مد ف عمري لغاية ما اشوفه بيشغي ناس
استعنا عالشقا بالله