التعليق على الصورة : ( ميك اب )
مس نجوى اما دخلت المدونة مرة كتبتلي تعليق .. كان فيه القصيدة بتاعة :
( اسكندرية الصبية .. بنية امبارح .. اموت في عودها السرح .. وف رمشها السارح ) ..
* بالمناسبة ( بنية ) بكسر الباء .. والتشديد المكسور على النون والياء ..
زي انثى الجن اما بنقول عليها جنية .. ( بنية بمعنى صبية )
ليه احنا مصدقين القصة دي قوي .. ليه متخيلين اسكندرية فعلا عبارة عن بنت اسكندرانية..
شقية ومجنونة وحلوة ..
تعشقها وتتمناها من اول مرة تشوفها .. وتحقد كمان على حبيبها ؟؟
عشان ببساطة دي الحقيقة ..حالة عشق مجرم .. من النظرة الاولى تقول .. بحبك .. والله العظيم حبيتك .. وتعرض عليها بسرعة انك عايز تكمل بقية حياتك معاها .. مش مصدقني ؟؟ بص عالصورة ..
ها ؟
ايه رايك ؟ .. عموما بلاش تحاول تعرف السحر جاي منين ..
كان غيرك اشطر .. في ناس اتولدت وعاشت وماتت هناك وماعرفتش تقول ايه المعنى ..
مرة واحد قاللي وهو بيحاول :
اسكندرية دي يابني زي الرقاصة .. بتكسب لقمة عيشها من حلاوتها ..
وانا رفضت..
التاني قال : لا لا مش رقاصة اوي يعني .. هيا بنت بتناغش البياعين عشان تاخد ديسكاونت..
وانا رفضت
التالت قال :
لا .. هيا زي عارضة الازياء .. شغلتها تلبس وتتهندم . وتاخد فلوس..
وانا رفضت
وقلت : اسمع يا حمار منك له له له .. نعلمكم .. ونأكل من عرق جبيننا :
اسكندرية يا حمير لوحة حلوة في معرض .. انت بتقطع تذكرة عشان تدخل تتفرج عليها
اساسي كده الحمير بقو اربعة ..
القصة ومافيها : ان اسكندرية حرامية ..
تخطف منك الروح اول ما تخطيها
وتسيبك ترجع بيتكم من غير روحك
وترجعك السنة الجاية تدور عليها..
ناكل بقى العيش على قفا الروحة والجية .