- كنت فين اليومين اللي فاتو ؟؟
- أهو !!!
اختر من بين الاقواس بناء على الحوار السابق :
صاحب الرد في الحوار السابق :
( مخنوق من السائل لانه لسة شايفه اول امبارح وبيستهبل )
( قصده يقول للسائل - انجز- وارمي البقين اللي انت متصل تقولهم )
( شاف الهلبؤات كلها اليومين اللي فاتو دول لذلك يفضل عدم الحديث عنهم )
( لا يحب المسؤل صيغة السؤال بهده الطريقة )
الحل النموذجي :
( جميع ما سبق )
_____________________
( وردة ف جنينة .. وجنينة عطشانة .. زرعوها وحيدة .. وم الوحدة دبلانة .. وعدوها الجنة ..
وعدوها دنيا حلوة .. وفاتوها في النار .. تطفيها من غير مية .. وردة ف جنة .. ووردة ف نار .. الوانها حلوة .. العين تحتار )
الفقرة السابقة كوبليه من اغنية الفنانة المعتزلة : عايدة الايوبي .. وردة ف جنينة .. اجب عن التالي :
1- مين الوردة ؟
2- اين تقع الجنينة ؟
3- مين اللي وعدوها بالجنة .. وخوزقوها ؟
4- ازاي هتطفي النار من غير مية ؟
الحل النموذجي :
( جميع ما سبق )
_______________________
( غريبة الناس .. غريبة الدنيا دية .. اعز الناس .. بيتغير عليا .. مفيش احساس .. مفيش ولا ذكرى ليا
.. خلصنا خلاص .. انا ماشي وجيبها فيا )
الفقرة السابقة كوبلية من اغنية غريبة الناس .. للفنان وائل جسار .. اجب عن التالي :
1- مين المقصود بأعز الناس ؟
2- هيا ايدك بتوجعك اوي ياد يا مرسي ؟؟
الحل النموذجي :
( جميع ما سبق )
__________________________________
زمان كان مدرس العربي بيقولنا وهو عمال يتفتف علينا في الفصل .. - وكأن ده نوع من البركة لازم يتوزع علينا بالتساوي عشان ناخد موهبته في الاعراب - ان المعنى في بطن الشاعر .. ويبطل كلام ويبصلنا اوي عشان يتأكد انه مفيش حتى واحد فهم الكلمة دي .. ويكمل كلامه .. وهنا كنت بسرح منه .. يعني ايه في بطن الشاعر ؟؟ وليه ما رجعش الشاعر ده علينا عشان نفهم ام المقصود من البيت ده اصلا ؟؟ وليه اصلا بلع المعنى .. هل ده نوع من الطمع .؟؟
لم يستطع حتى استاذ اللغة العربية في الجامعة ان يشرح لي لماذا يقوم الشاعر بتخزين المعنى في بطن امه ويسيبنا حيارى في المعنى ..
بس مرة تيتة قالتلي ف وسط شكوى كنت عمال بقولها وانا محروق ..
- وشايل ف بطنك وساكت ؟ .. - قالتها وهيا بتديق ف عنيها عشان تدي معنى للي بتقوله
افتكرت انه تيتة فهمتني غلط في قصة شايل في بطني دي .. وبسرعة فهمت انه قصدها اني كاتم الشكوى..
اااااه .. بقى هو قصده كده ؟؟؟
وطلعت موضه بقى من ساعتها .. شعراء العصر الجاهلي وانت طالع .. سمعوا تفسير تيتة للموضوع واشتغلو بقى
كل واحد مفقوع من حاجة .. يلمح ليها .. ويسيبك تفصل قميص الحزن على مقاسك.. انت ادرى
هو المعنى مش في بطن الشاعر ولا حاجة .. المعنى في بطنك انت شخصيا .. وانت ادرى واحد ببطنك فيها ايه ..
عموما .. بركة اللي ما قلت..