الحلقة الرابعة : انا الرقاصة

بقينا غلابة .. وما بنجيبش عوالم ولا غوازي ولا رقاصات في افراحنا ..

مع ان حتى السيد احمد عبد الجواد في الثلاثية ..
جاب رقاصة ..
بس ما تدايقش نفسك اوي ..
اعمل فرح وماتقلقش
الرقاصة جاية ..

.........................................................

الجنس : غير معروف 
السن : عز الموسم بتاعه 

ضحية النهاردة كلنا خلاص عرفناه ..
هو الشاب اللي بيثير قشعريرة في جمسك اما بتشوفه
بيدخل الفرح كده راسي ورايق ومكسوف
وبيطلع يتصور مع العريس وهو عسل كده وكتكوتة 
لغاية ما بتاع الدي جي الله يكرمه ..
بيشغل الاغنية اللي بتعمله الحالة
بيقلع جاكتة البدلة - اذا كان لابس بدلة -  
وبيبان على حقيقته
شاب ( سلق عناب )
ماتحاولش تفهم الكلمة اللي فاتت دي لو مكانش ليك في لغة العوالم ..
...............

ايه المهمة المقدسة اللي عشانها ممكن حد يعرق العرق ده كله ويعمل المجهود ده كله
كل دي مجاملة لناس الفرح ؟
والله يشكر..
طيب ليه بالاخلاص ده
ليه لما جم ناس الفرح سقفوله ونزلوه وقعدوه مكانه قام تاني ؟
صح ...
عشان بتاع الدي جي الخبيث..
عرف الworm عنده بتشتغل منين
وهيشتغل الناس بيه طول الفرح .
طيب ليه ملامح وشه بتبقى منفرة اوي اول ما يبدأ يلعب حواجبه
ويغمض عينيه كده في منتهى المتعة
ويحلق في سماء فن الرقص الشرقي الاصيل
طيب ليه لو هو عنده شخصية استعراضية
مارقصش بعصاية مثلا ؟؟
بلدي ؟؟
راب؟؟
بنتوميم حتى ..
اي رقص ؟
اشمعنى رقص النسوان ؟؟؟؟؟؟؟؟؟؟
وهز الحاجات كده والعض عالشفايف ؟؟
هل ده نيجاتيف وعايز يطلع م الفرح ده ببوزيتيف مثلا ؟؟
استغفر الله العظيم
افسم بالله الناس دي بتطلع الواحد عن شعوره وادبه ..
انا مش هسيب الوصلة دي تكمل ..
اسوأ نهاية للشخص ده ممكن محدش يتوقعها ..
ابلغ عنه الحاج / حامد الجامد ..
دا راجل مايحبش الحال الميل
ولا الهزار في الجد
ولا الهزار في الهزار
ولا المية في الغربال
ولا اي حاجة في اي حاجة ..
وزي مانتو شايفين ..
الحاج حامد شق زحمة المتفرجين ..
ورفع صاحبنا اياه على كتفه ..
وقصد بيه برا الفرح خاااالص
ورا الصوان ..
عموما اللي هيحصل ورا الصوان مش من اختصاصنا خالص
احنا ورانا فرح لازم نتممه على خير ان شاء الله..
اتفضلو اتفضلو ...
عقبال عندكم جميعا 
.................................................... 

الحلقة الثالثة : انا الدواسة

شاب دواسة :  هو الشاب الذي يمتلك سيارة بيلم فيها الشلة .


او الشاب اللي بيلزق للشاب اللي معاه العربية عشان يفسحه فيها وهما مش طايقين بعض


بنت دواسة : اللي بتدوس مع اي ولد طالما معاه عربية


ايه علاقة ده بالفرح ؟؟


تعالو نشوف..


.................................................................




الزفة ..
جزء اصيل من افراحنا الخنيقة ..


اللي هو الجزء بتاع :
بييب بييب ... بيب بيب بيب ..


جنس الضحية : ذكر
السن : شاب كده محلون ..
الشكل : ماقلنا محلون ..


.........................................


المنظر :
الجميع اما باب الكوافير ينتظر خروج العريس بالسلامة مأنكجا عروسته الحلوة ..


وعربية الزفة بتاعتهم مستنية ..
عدد من السيارات تنتظر لزف العريس بعد خروجه ..


طلعو النسوان الكبار ..
عربية 128 بيضا شكمانها مخروم وصلت قدامهم ..
اتحشر في العربية حركة سبع نسوان
ماتشغلش بالك دخلو ازاي
ليهم طريقة ..


طلع اخو العريس ومراته .. ورواحو على الشاهين بتاعتهم ..


باقي العربيات .. واقفة وكل واحد منشن على بابه عشان وقت الاكشن كله بينط
والزفة بتنطلق في ثواني ..
كأن سواق عربية العروسة عايز يهرب
..
طلعو البنات ..


صوت امريكاني مزعج على الاسفلت
تلات اربع ضحايا ومصابين من الاولاد لابسي البدل السوداء والرمادية
باقي عربيات الزقة دخلت في بعضيها عند باب الكوافير
وباقي الشباب فهم اللي فيها وراح يشاور لتاكسي يروح بيه النادي
الشاب الدواسة العسل طلع وفتح بيبان العربية
بيشاور بنتهى الحماسة للبنات على عربيته ..
بيفكرني بالراجل المزعج اللي بيقابلك وانت ماشي في الحسين ..
( اتفضل يا باشا .. في مكان للاسر مكيف يا باشا .. احلى اكل واحلى اسعار يا باشا )
ناقص عالواد بتاع العربية ده انه يقول زي كده ..
( اتفضلي يا مزة منك ليها ..  كراسي جلد .. سماعات بايونير جديدة .. تكييف .. 
اضاءة خافتة .. هدرمغ بيكم الزفة .. انا قالبها ديسكو جوه يا مزز ) 

البنات طبعا هيركبو .. انا وانت عارفين انهم هيركبو ..
معظم البنات بتحب تعيش شخصية الدواسة ولو بشكل شرعي زي الزفة مثلا ..
دايس يا برنس .. 
طب والولاد اللي كانو معاه في العربية 
..............الولاد اللي في العربية  
( كمل انت مكان النقط )

ودا طبعا بيقلب على ماكلارين اول ما يركبو معاه الحتت 
يعني ممكن تخمن انهي عربية في الزفة اللي فيها البنات ..
من غير ما تكلف خاطرك وتبص جواها ..
هيا العربية اللي بتحس ان فيها مشكلة اكلان او حرقان ..
بتزاحم كده وتندب وسط العربيات وتعمل دوشة ومشاكل ..

انا بكره الشخصية المستفزة دي جدا ... 
لذلك .. اكد انتو خمنتوا ان البنات اللي ركبو معاه دول تبعي ..
ايوه صح ..
الموتة المرادي تلغيم ..
بعد ما البنات نزلوا ..
وسابو القنبلة تحت كرسي السواق ..
والعربية وصلت اخر الشارع ...
بووم
عادي يا جدعان ... تلاقي كاوتش عربية ضرب ولا حاجة ..
اتفضلو اتفضلو ...
اهلا اهلا ..
عقبال عندكم جميعا ..

................

- الو .. ايوه ياد .. اتأكدلي ان ابن ال....... ده ماطلعش م العربية قبل ما تولع ..
ماشي .. باي.
..................... 

الحلقة الثانية : انا الحلوة .

اكيد عرفتوا ضحية النهاردة مين ...  !!

صح !!!
.......................................................

الجنس : انثى
السن : اي سن مابين الطفولة وسن اليأس الشديد
الشكل : انظر الصورة اعلاه .

ضحية النهاردة هي البنت اللي بتاخد الفرح من اوله لاخره ( خمسات ) .
امريكاني يعني من اول الفرح لاخره..
في احيان كتير بتكون لابسة فستان سواريه ( بفتح السين والواو ) بلغة الضحية .
ولازم جدا جدا تمسك فستان السورايه بأديها . وترفعه حبة وهيا بتمشي ..
دا بيبقى حلم بيراودها كتير قبل الفرح بايام وليالي ..
انها تمشي تكر فستانها في الارض وترفعه هيا بايدها
دا بيديها منظر اسطوري محبب ..
بتتواجد في كل مكان ..
وعلى وشها تعبير واحد
( انا الحلوة )
انا اللي في الفرح دا م الاخر ..
فكك من الجنب بتاع الستات دا كله وركز مع المهم
انا الحلوة .. والباقي مش حلوين .
طبعا الشخصية دي بتتمتع بتناكة غير طبيعية ..
اوعا تبصلها خالص لان دا هيكون بالنسبالها..
 عقد ممضي من اتنين موظفين.. انك هتموت عليها
هتروح واخداك من فوق لتحت..
اشمئناط
على قرف
على تناكة
واوعى وشك لا الحلوة تقشك
وبرضه هترفع ضغط دمك فمالوش لزمة ..
احسن من عمرو ماكجايفر بطل مصر في التخميس والامريكاني
هتستعجب هيا جايبة منين مهارة المناورة والقفز والتفادي والتخميس
الشخصية دي بتختفي كل شوية لانها بتروح التواليت تظبط الميك اب
اوعى يكون عندك امل انها مشيت ..
لا موجودة
دي بتمشي اخر وحدة في الفرح
دمك تقييل
تقيييل
تقيييييييييييييييييل
انا مش هسيبك تكملي الفرح ده ...
حد فيكم خمن هقتل الشخصية دي ازاي ؟؟
صح .. موت بطيئ بشع
هقفل عليها باب التواليت واحبسها جوة لغاية ماتموت
تمووووووووووت
على ما يكتشفوها تكون ان شاء الله ماتت
ونعيش احنا في فرحنا الجميل ده
اتفضلو يا جماعة محدش يتخض ..
دا لسة في ضحايا يااااااما في الفرح ده

اشوفكم بكرة على خر مع الضحية التالتة