هنشتغلوك يعني هنشتغلوك

ايام ما كنا في الجامعة كان في دفعتنا بنت امورة خالص .. من زاوية عيني .. كنت ملاحظ عليها حاجة .. البنت مش مهتمة قوي بربطة الطرحة .. وكانت بتتزحلق ساعات من على شعرها الناعم .. مش مشكلة لو اللبس مكرمش شوية .. اصلا اللبس غالي وكرمشته عملاه اوريجينال ( محدش يسألني ازاي عشان ماليش فيه ) .. ومكانش فيه ميك اب تقريبا .. بس كانت احلى بنت في الدفعة وتقول انا حلوة .. ما تحبش تقف جنب صاحبتنا دي عشان هيطلع شكلها عادي .. او وحش ..

شخصيا حاولت اقلد البنت دي .. كنت بسيب شعري منكوش ساعات .. والبس قميصي من غير ما اكويه .. وكنت هبطل استحمى .. كنت هتجنن .. والله كانت هتجنني .. ولما تبص في عينك .. البنت ماهياش خايفة .. وعنيها تقولك انا مش خايفة .. ممكن تكون الجيب بتاعتي مكرمشة وشكلها عرة .. بس زي القمر.. .. فضلت متحمل الوضع .. لغاية ما شفتها مرة وكانت يادوب صاحية من النوم من ساعة .. ونازله من البيت كيفما اتفق ( يوم نتيجة طبعا ) وباكية لما مقطعة نفسها ..وبت الكلب .. بت الكلب شكلها طالع احلى م الاول

بقى الناس كلها بتجري تشوف هيا عامله ايه .. وانا رافع صباعي زي اللي بيوحد .. وبحسبن فيها
خد بالك من التالي
هيا عارفة ان مهما حصل عندها اللي يخليها حلوة في عنين الناس .. فبقى البس اي حوار ومافيش مشكله

هيا واخدة بالها ان فيها حاجة غلط .. مبهدلة وحلوة .. غير منمقة .. لكن جذابة لحد المرض .. لذلك اول ما بتشوف نظرة الحيرة في عينك .. مش بتاخد بالها ساعات .. لانها متعودة .. داااايما ..

ممكن مرة كده تلمح طرف شفايفها بيضحك على حيرتك .. عادي يا غبي .. انا حلوة

يمكن بعضكم خمن من الصورة اللي فوق .. علاقة دا بالموضوع

اللي ما خمنش ايه العلاقة .. مايجيش المدونة دي تاني يا اما هاقفل المدونة عليه وادور فيه الضرب بالشبشب


جه الوقت اللي اشتغلكم فيه انا باسكندرية .. زي ما اشتغلتني اسكندرية

الموضوعات اللي جاية معظمها عن اسكندرية يا رب ان شاء الله .. مش هرحمكم .. الا لو حد اتبرع وسفرني اسكندرية على حسابه

هنشتغلوك يعني هنشتغلوك