لا بيرة .. لا خمور

شوفت العبارة دي مكتوبة على واجهة محل مشهور في اسكندرية اسمه ابو هاشم.. اكيد عارفينه .. حسيت انه صاحب المحل شاف اللي شغالين في شيفت بالليل مثلا بيتطوحو جامد ... فحب يثبت عليهم التهمة فكتب انو المحل لا يقدم البيرة او الخمور .. في يافطة كبيرة .. حاجة كده زي الواد علي كراته اما يضرب العجلة اياها ( يضرب العجلة يعني ياخد الكيميكال اللي بيخليه زي الضفدع الدكر في موسم التزاوج ).. ويبدأ نوبة عمله المسائية بكل همة ونشاط.. ولو حصل و سقط عليك في الكلام .. يقوللك انا كويس

انا شخصيا كويس ... رغم انى رحت اصور الباخرة السياحية في يوم الزمالك والريسيبشان كان رأيه اجي بكره .. ورغم ان هشام طلعت مش راضي يموت .. لكن محمد بركات قرب يرجع لمستواه ,,والريس كمان قرب يرجع البلد .. وفي القناة بتاعتي هخلي النشرة الرياضية في الاول .. وبلاها ضحك عالدقون .. وفوزية البقالة ليها عشرة جنيه وانا ليا برة ستين جنيه .. يعني يدخل جيبي صافي اربعين جنيه وعلبتين روزمان .. والقطة الجديدة سعيدة .. دا اسمها انا ماليش دعوة .. وماليش دعوة اما انصحك واقولك دور عالدمعة وانت لوحدك .. على مسؤليتك بقى تبكي في اللوبيهات وعالسلالم .. شوفلك حل في الفرامل .. وما تدخلش شمال في الناس .. وسيبلي نفس في السيجارة دي .. رغم انها شرعي

انا بجد كويس مفيش حاجة