فتافيت ... الحياة حلوة !!!

فتافيت دي قناة فضائية .. مصرة في ( السلوجان ) بتاعها ان ( الحياة حلوااااا ) ..
 وبعد ما يقوللك ان الحياة حلوة ..
 يجيبلك وصفة طبخ جديدة.. لانها طبعا قناة طبخ ..


( الحااياااة حلواااا ) ..


وصفتي النهاردة :


مقادير الاكتئاب : ( على طريقتي .. ومجربها .. ولسة باكل منها لغاية وقت كتابة هذه السطور )




- شقة فاضية محدش معاك فيها .. منزوعة الاثاث والاضاءة 


- اضف الى الشقة عدد : 1 غلاية شاي , 2 كوباية فاضية - يمكن حد ييجي ( ووالله مش هييجي ) .  كيس سكر فاضي عشان الشاي بالمرة كمان يطلع مر زيادة في المرار , علبة شاي نزل فيها حبة تراب ناعم من غبار الشقة لايمكن فصله عن الشاي .. ( جيد المذاق )
, مرتبة رفيعة رش عليها شوية رمل من جزمتك وشوية فتافيت عيش تشوكك وانت نايم .., جهاز تكييف صوته عالي .. يفكرك طول الوقت انك لوحدك ومش محتاج توطي صوته عشان حد يسمعك او تسمع حد , تلفزيون ملون 21 بوصة فيه وصلة مقطوعة طول اليوم,
جهاز كومبيوتر + انترنت عشان تدخل تسيب مقادير وصفتك .


- تخلص من رصيد تليفونك قبل خلط المقادير


- لا يمكن اضافة فلوس في اي مرحلة من مراحل الاعداد


- احرص ان تنهي علبة سجايرك قبل الاعداد باستثناء سيجارة واحدة مكسورة هتلحمها بريقك لما تخرم ,
 وهتصعب عليك نفسك جدا ودا مفيد جدا في الوصفة .


استخدم كل المقادير السابقة بافراط .. اخلطهم سويا .. ستحصل على خليط صلب القوام , مر المذاق ,
سيبقى اياما طويلة في حلقك ..


استخدم نارك لتطهو الوصفة..


يقدم باردا وكئيبا ..


وبالهنا والشفا .