من زمان نفسي اعمل الفوازير دي ... فوازير ( فرح ) ..
كل يوم هقتل شخصية من حوالي 21514251 شخصية بيفقعوا ... مرارتي في الافراح
.. وطبعا الشخصية دي هتلاقيها في كل الافراح
وبما انه بعد شهرين تقريبا هيكون عندي فرح .. هلعب فيه دور السنيد ..
فانا هقتل كل الشخصيات دي قبل الفرح
وعلى الله حد منهم يجي
هقتله في الفرح ..
............................................................
الحلقة الاولى : انا المهم
الجنس : ذكر
السن : مفتوح
الشكل : بدلة عرقانة .. من ام 120 جنيه .. جزمة تشبه الكوتشي
شعر مصفف بأحكام ( وبيلمع ) , نشاط ملحوظ .. سخافة لا تطاق
الضحية الاولى هو الشخص اللي اول ما تدخل الفرح .. هتفاجأ بيه بيسلم عليك عالباب ..
ولما هتروح تقعد هتلاقيه بيشدلك الكرسي وبيرحب بيك..
وهو اللي بيمسك فستان العروسة
وهو اللي بينفض بدلة العريس
وهو اللي بيعمل كل الحاجات
وهيجبلك بعد شوية علبة سجاير ..
ولو رحت تحضر كتب الكتاب هتلاقيه قاعد متربع فوق صفحة القسيمة ..
غالبا بيخطف منديل كتب الكتاب وهو بيضحك ضحكة سافلة
تتمنى لو فردة من الكوتشي اللي في رجله ..
وتدوبها على وش امه لغاية ما تشفي غليلك ..
طول الوقت بيزعق لاشخاص وهميين وبيقولهم حاجة مهمة جدا
وبيتعمد يكون جنب سماعة الدي جي عشان يزعق قوي
ولما بيمسح عرقه بمنديله المحلاوي القذر بيسأل نفسه في حيرة صادقة ..
كان هيحصل اايه لو انا مش هنا النهاردة ..
مش بيمشي ابدا .. بيهرول بس
لان كل حاجة بيعملها مهمة كييييك ..
وبعد شوية هيرقص شوية كنوع من التحية لاصحاب الفرح..
رقصة تتلخص في انه بيمسك بدلته من الناحيتين ويرفرف بيها
يفتحها كده ويدخل بيها عاللي بيرقص..
يا لطيف الطف بينا يااااارب ..
الشخص ده دايما عرقان يا جماعة ودا جزء من شخصيته ..
لو وقفت جنبه وهو بينهت في الفرح وسألته انت تقرب ايه للعريس..
او للعروسة ..
هيشاورلك غالبا على ست كهنة مقعدها جنب السماعة عشان يعذبها او يموتها ..
ويقوللك ..
دي ام بنت خالة سلفة العروسة ..
تسأله : اللي هي امك ؟؟
تؤ تؤ .. دي تبقى مرات خال ابويا ..
يعني قريب العروسة زي مانت شايف قرابة عصب .. عصب ..
اكتر من اخ ..
في حاجة تاني في الشخص دا .. لا يمكن احراجه بأي شكل ..
حتى لو احرجته هيضحكلك ضحكة هترفع ضغطك ..
خااالص ..
انا هختار موتة بشعة للشخصية الحقيرة دي ..
ومن اول الفرح عشان مش طايق استنى واشوف اللي هيعمله ..
عارفين السيخ اللي بيبقى فيه حاجات غريبة دا وبيمسكوه فرقة الزفة ..
بيولعو فيه النار ويرفعوه فوق جنب العروسة والعريس في الزفة ؟؟ ..
كانه سيف ...
هخطف واحد كده وهو مولع ..
وهحطه ... في ...
عينه ..
وهستمتع بصراخه .. وهنسقف كلنا .. وهيبقى فرح ان شاء الله غاية في الجمال ..
بس اموت باقي العشرين شخصية اللي في بالي
وهيبقى فرح لا ينسى
مستنيكم بكره مع شخصية جديدة
وموتة جديدة ..
الى اللقاء
ليست هناك تعليقات:
إرسال تعليق