 |
عايز اتجوووووز |
محمد الحجيري .. صاحبي وحبيبي كفاءة .. طلبت منه انه يكتبلي الحلقة دي ..
والراجل اعلن استعداده .. رغم مشغولياته
والجهاد .. اللي بيجاهده ..
واختار شخصية بجد انا لازم اموتها موتة شنيعة ..
اسلوب محمد بجد عسسل
والحلقة عجبتني جدا ونشرتها بلا تعديل
.....................................................................
انا بصراحة شفت فوازير الفرح اللي كاتبها ومبتكرها صاحبي واخويا كريم
وكان نفسي اشاركه فيها لاني زيه بالظبط مغلول ومستاء من اوضاع كتير في افراحنا
اللي ما بتخلصش طول السنة وفي اي يوم واي وقت....
الاحصائية دلوقتي بتقول ان في كل مدينة وكل حارة وكل نجع بتعمل حوالي
"100000000000000" في اليوم..وخصوصا في الصيف مع ( العرق)
اللي هوا طقس اساسي في اي فرح زي ما كريم كلمكم....
المهم ماطولش عليكم...شخصية النهاردة شخصية من زمان نفسي اتكلم عليها
وبلاحظها في اي فرح, الجديد بقي النهاردة انك بتلاقي في الفرح الواحد علي الاقل 10 من الشخصية دي
علي عكس الشخصيات اللي فاتت
نتكل علي الله ودقي يا مزيكا
الجنس: ذكر
السن : عزه " بكسر العين وضم الميم
الشكل: شاب تبدو عليه مظاهر الجدية ومسبسب ولابس في الغلب بنطلون جفردين وقميص كتان
وبكرش صغير ودايما مش لابس بدله لانه مش جاي اصلا للفرح ولا لصاحب الفرح
ولا لام اللي جابت صاحب الفرح وكمان مش فاضي
الضحية دي اللي بعد ما بتدخل الفرح بشوية والناس بتبتدي تقعد
( وخصوصا النسوان وبالاخص الشابات العانسات)
بتلاقيه دخل الفرح لوحده خالص ولو شافك يا اما هيعمل من بنها
او هيسلم عليك علشان مصلحة.....طبعا
هذا الشاب بتلاقيه دايما واقف في اخر الفرح ورا النص بتاع الحريم وحاطط ايده في جيوبه
وبيرقب بكل اهتما وشغف كل كبيره وصغيره بتدور في نص الحريم
وبعد وقت معين بتلاقيه بدا ينقي الامورة اللي هيرسي عليها العطا والمزاد " اللي هيجي بعدين طبعا"
ويا سلام بقي لو غلطت غلطة عمرك ووقفت معاه او سلمت عليه,
هتلاقيه بيكلمك في اي حاجة عبيطة ومش معاك نهائيا وبرضو لسه ايده في جيبه
ولو زهق بقي هيبتدي ياخد رايك في اللي لابسه جزمة حمرة
واللي مطلعة قصة من الطرحة والبيضة والسمرا والخضرا والبني
هيحسسك انه الشخصية بتاعة عبد الرحيم عمرو,
مع اختلاف الظروف ان الازمة دلوقتي بقيت ازمة عرايس مش عفش
ودا طبعا بيبص علي الحسب والنسب وانها تكون بتشتغل
وتكون لابسه من عند محلات الكاشف وبتشتري من كانديلا
لانه شاب فييس ومايهمهوش الفلوس ولا الشروة المهم انه يتعمله فرح زي دا
وبعد شهر يكون واخد علبة الشيكولاته ورايح للعروسة اللي اختارها
وماسك الموبايل 102546 ساعة في اليوم
ويملي درج الشفنيرة عنده كروت فاضية
من الاخر الشاب ده جاي في مهمة سرية لولبية حلزونية دائرية
الا وهي جمع اكبر قدر من البيانات عن احلي البنات في الفرح
وانصح كل شاب عاقل انه لما يشوف الشخصية دي داخله الفرح
يبعد او يدخل في بق واحد هيكون احسنله بكتير ان شاء الله
النهاية بقي اسيبها لاخويا كريم لانه هوا عشماوي الفرح
بناء علي الغل والغيظ اللي جواه من هذه المهزلة
معلش طولت عليكم..وعقبال عندكم جميعا
اقعدوا بالعافية.. وسمع هسسسسسسس
.....................................................................
خلصت حلقة محمد وبدأ دوري
...................................................................
عمي محمد ... عنك انت .. الواد ده بتاعي ..
الموتة المرادي مبتكرة ...
وابتكرتها من موقع الشاب ده في الفرح ....
هزق عليه .. الوغدة .. سلوى الكدابة ..
وهيا معدية من جنب الواد ..
هتصرخ بأعلى صوتها ..
( يا بن الكلب !!! )
الناس - ايه يا بنتي مالك ..؟؟
سلوى الكدابة - ابن الكلب ده تحرش بيا ..
الشاب الباحث - حرام عليكي انا جيت ناحيتك ؟؟
سلوى - جيت ناحيتي ؟؟؟ انا لسة مطلعة ايدك من ....ي يا واطي ..
الناس - من ......ي ؟؟ هاتوه ابن ال......
وطبعا الفرح مليان رجالة نفسها تجامل ..
يا ريت ما يكونش حد من المعازيم بيتشائم من منظر الدم والسحجات والكدمات ..
دي ليلة مفترجة واحنا معانا عريس عايزين ندخله دنيا
سيبكم من صاحبنا اللي بيتشبح ضرب في السايد بتاع النسوان ..
احنا ورانا فرح ..
اتفضلوا اتفضلوا ,.. دحنا زارنا النبي ..
..............................................................
